الموضوع قبل التحديث كان تساؤلات عشرة عن النظرة الاسلامية للمرأة من القرأن والسنة ، ادرى انها لم تكن اسئلة (بريئة) ، بل تحمل حكم على الاسلام بظلم المرأة ، بمعنى لو كانت هذه التساؤلات بلا تفسير او اجابة (وانا اراها كذلك ) فيمكن تلخيصها فى سؤال واحد "لماذا يظلم الاسلام المرأة؟" وليس "هل يظلم الأسلام المرأة؟"
بعد ان مللت من بروباجندا "الاسلام الرائع" التى علموها لنا فى طفولتنا وصرنا نرددها بالتتابع ، فإذا ذكرت قضية المرأة وجدت الجميع يقول "الاسلام جميل ياولاد، وكرم المرأة ، ده حتى لغى الوأد ، و ادى للمرأة ميراث، وسيدنا محمد قال اوصيكم بالنساء ورفقا بالقوارير " ، حسنا هذا رائع ، ولكن ماذا عن اوجه الظلم التى هى موضوع النقاش ؟ تخيل لو ان احدهم عانقك و ركلك ، فقولت غاضبا له "ركلتنى !!" فيرد متستنكرا عليك غضبك :"لكننى عانقتك !! "
على اى حال ، فسر الكثيرون تساؤلاتى على انها نقص علم ، وبعد محاولة بحث عن تفسيرات ، كانت النتيجة ليست المرجوه للأسف ، اخشى ان ظلم الأسلام للمرأة تحول إلى حقيقة بالنسبة لى ، ولا تساؤلات اضافية
ارى ان الاسلام ينقص من كرامة المرأة لأنه يراها أنثى فقط وليس كأنسانة ، ويلغى إرادتها على ذاتها لأنه يراها مملوكة للرجل ، فهى خلقت لكى تمتع الرجل وتنجب له وتشبع رغبته فى الامتلاك ، فإذا كنتى زوجة مسلمة فأنتى مجبره على معاشرة زوجك متى شاء هو ولتذهب مشيئك انت إلى الجحيم ، فلو ابيت لسبب او حتى لمجرد عدم رغبتك فتحملى لعنات الملائكة (الحديث مذكور لاحقا)، و صياح السيدة الحورية المستقبلية فى وجهك من الجنة (عن معاذ بن جبل عن النبي قال:لا تؤذي امراه زوجها في الدنيا الا قالت زوجته من الحور العين لا تؤذيه قاتلك الله فانما هو عندك دخيل يوشك ان يفرقك الينا) ! وكرامتك مرهونة على امتاع زوجك ، فالنهى فى الاسلام عن ابراحك ضربا ليس سببه الاول الحفاظ على كرامتك ولا الخوف عليك من الاذى ، بل السبب الاول هو ان لا ينهكك الضرب فتحتفظين من قوتك بما يكفى لإمتاع زوجك المقدس اخر الليل (عن عبد الله بن زمعه عن النبى قال : الام يجلد احدكم امراته جلد الامه ولعله ان يضاجعها من اخر يومه ) ،و اذا لم يروقك الامر و اردتى الطلاق فقط من اجل ذلك فالجحيم مثواك (عن ثوبان ان رسول الله قال :ايما امرأه سألت زوجها طلاقا من غير بأس فحرام عليها رائحه الجنه) ، اما إذا كنتى امرأة مسلمة و غير قادرة على القيام بدورك فى دعم حملة تكاثر المسلمين ، فانت عديمة القيمة ولا حاجة إليكى (عن معقل بن يسار رضي الله عنه قال : جاء رجل إلى رسول الله صلى الله عليه وسلم فقال: يا رسول الله إني أصبت امرأة ذات حسب ومنصب ومال إلا أنها لا تلد أفأتزوجها ؟ فنهاه . ثم أتاه الثانية فقال له مثل ذلك , ثم أتاه الثالثة فقال تزوجوا الودود الولود فإني مكاثر بكم الأمم )
حتى عندما وصى الرسول بالنساء قال "استوصوا بالنساء خيرا ..فإنهن عندكم عوان (يعنى اسيرات) لا يملكن لأنفسهن شيئا"!!
فلا يأتى احد ليقول لى "وصيت عليكى الرجالة قبل مااموت ، وقولت رفقا بالقوارير ، وحفظتلك حقك فى نفقة ومهر وسكن وميراث ، بس انقصت كرامتك وسلبتك ارادتك وحريتك فى نفسك"
شكرا ياسيدى ولكن... هذه ليست قهوتى المفضله !!
نعم ياسيدى ، انا امرأة ..ولكن ماذا ينقصنى لاكون حرة بلا اسر ولا عبودية ؟ ماذا ينقصنى لاملك نفسى كلها لنفسى؟ ماذا ينقصنى لكى ارغب فى اشياء وارغب عن اشياء؟ ماذا ينقصنى لاتخذ قرراتى لذاتى؟ ماذا ينقصنى لاكون انسان ؟ فى شرعكم ياسيدى ،يبدو ان كل ماينقصنى هو صفة التذكير !
دروب 28/12/2007
محدش ينكر ان "الاسلام رفع مكانة المرأة" ، ولكن هل رفعها كفاية لتكون على نفس مستوى مكانة الرجل؟
-----------
ليه المرأة فى الاسلام دايما (مفعول به) ومتنفعش تبقى (فاعل)؟
-----------
ليه المرأة مكتوب عليها تبقى (ديل) لـ (ولي) راجل؟ متسافرش من غير راجل ، متتجوزش منغير اذن ولي إلخ
-----------
ليه العلاقة الزوجية فى الاسلام كأنها من طرف واحد ؟؟؟ كأن المرأة مخلوقة لمتعة الرجل والعكس غيـــر صحيح (مثلا :حديث "لا تصم المرأة يوماً واحداً وزوجها شاهد إلا بإذنه" ليه كمان الزوج ميستأذنش زوجته لما يصوم؟؟ - وحديث "إذا دَعَا الرَّجُل امرأته إلى فِراشه فأبَتْ أن تَجيء لَعنتها الملائكة حتى تُصْبِح " اشمعنى لو المرأة دعت زوجها للفراش ورفض يبقى عادى الملائكة مش هتلعنه ولا هيحصله اى حاجة، وكمان هى عافية؟ -وآية "نساؤكم حرث لكم فأتوا حرثكم انى شئتم" ) الخ
-----------
ليه فى الاسلام لما الزوج يعوز يسيب زوجته بس بيقولها "انتى طالق طالق طالق" بسبب او منغير سبب، ولما الزوجة تعوز تسيب زوجها تبهدل فى المحاكم؟
-----------
......بإفتراض ان (مبدأ) العلاقة الزوجية فى الاسلام هو :زوجة مطيعة و زوج عطوف او رحيم.
ليه فى عقاب إلهى واضح وحازم (لو مش قاسى) للزوجة لو اخلت بالمبدأ "ايما امرأة باتت وزوجها عليها غضبان باتت تلعنها الملائكة حتى تصبح" ، ومفيش اى عقاب للراجل لو اخل بالمبدأ وبهدل زوجته؟؟؟؟؟
ليه القران قال للزوج يعمل ايه لو زوجته مبتسمعش كلامه او ناشذ "عظوهن واهجروهن فى المضاجع واضربوهن" !! وماقلش للزوجة تعمل ايه لو زوجها مفترى؟؟؟؟؟
-----------
ليه كل ايات القران يبقى المذكر الاول "ذكر او انثى/المؤمنين والمؤمنات الخ" إلا فى ايه واحدة "الزانية والزانى" ؟
-----------
بعد ده كله...هل فعلا الاسلام بيحترم المرأة كأنسانة بالقدر المطلوب؟؟؟
-----------
RSS Feed (xml)
40 comments:
عزيزتى نقطة الماء
أعتقد ان الأسلام أعطى المرأة الكثير والكثير , وان بعض ما نراه من الأسلام الأن أو للدقة بأسمه هو نتيجة قراءات مجحفة ومبتسرة فى مجتمعات تحط من شأن المرأة ولا تراهها الا مربط لللذة أو مقرونة بالخطيئة , ولا تنسى ان رسولنا الكريم قدم الينا أنقى صور التعامل الزوجى فى زوجاته طبقا لمفهوم الأسلام .. والمرأة فى القرآن وان جاءت مفعول به فليس هذا تحقير من شأنها بل - وهذا رآى - لكون الله تعالى قد جعلها فى معظم الأوقات ملزمة من الرجل أو هى تكون ذلك أغلب الوقت كأبنته أو زوجته .. أعتقد أنك ترين الصورة سيئة - وهى كذلك - لأنك لم ترين الا نماذج سيئة وألأدهى أنها تتعامل جميعا بأسم الدين .. وهل تعرفين المشكلة الحقيقية , أننا نحيا واحد من أشد العصور أنحطاطا, وأرجو الا أكون أطلت
على فكرة عاجبنى جدا العبارة المكتوبة فى البروفيل بتاعك ...انا لا اريد شاطئ ارسو عليه ،فكم يروقنى الابحار طيلة العمر.. وسأقضى حياتى على سفينتى ،وكلما لاحت لى يابسة لوحت إليها ان سلاما عليك ثم اكمل الرحلة ... إلى ان اجد طريقا إلى القمر .. الخ الخ
من أكثر المواضيع التي أحبها هو موضوع المرأة هذا لا أعلم لماذا بالتأكيد سيكون تعليقات كثيرة عليه إنشاء الله
أعتذر عن تأخيري في الرد علي تعليقاتك منذ فترة ولكن كل هذا بسبب إنشغالي مؤخرا بعدة مواضيع هامة تشبه الميدتيرم عندك
أتمني لك التوفيق فيه
لقد تركت لك تعليق في الموضوع الذي كنا نتحدث فيه سابقا
على فكره انا مش داخل ارد على الموضوع ده..بس بالمره كده لو عايزه تحسى بالمووضع ده فعلا اشترى كتيب صرخه فى مطعم الجامعه للدكتور محمد العريفى وإنها ملكه
بصى نصيحه هاتى كتب الراجل ده كلها
الراجل ده مش ممكن
اما عن الآيات فهى كتي وانتى فهمتى الآيات دى من منظور واحد على الرغم طبعا من فهمك العالى اللى لازم اشيد بيه والغريب فعلا انكى حافظه آيات كتير بسم الله ما شاء الله
بس انا بعد العديد من المناقشات والتساؤلات وصلت لبر آمان واهتديت للإجابه الشافيه واقتنعت فعلا بوجوديه الله سبحانه وتعالى وان الدين ده متكامل اى نقص يبقى نقص فى فهمنا احنا وعقولنا احنا
نصيحه اقرى اكتر وردى الشك للمشايخ والعلماء
هحاول اتكلم ف الموضوع ده قريبا مع أحد المشايخ وأفيدك
....
المهم بقه البوست اللى فات بجد مش ممكن ..هايل ده كلمه قليله عليه
ربنا يشفيهالك بجد
انا حبيت الصوره قوى الدماء وبعدين القلب ياااه وبتوزع مش ع الجسم لا ع البشريه كلها حنان ومحبه
ياااه ايه لالانسانه الجميله ده ايه الكائن الرقيق ده ايه النعومه دى
(ملحوظه لا يجوز تشبيه الملائكه بالإناث كقولنا ملائكه الرحمه على الممرضات)بس بعد الرقه دى يجى السائل الأبيض السم ...هو الكيماوى أبيض أول مره اعرف
ويدمر ده كله ويحل محل الدم الصافى الرقيق ..يااه بجد جميله والله
اصل انا وزمايلى عاملين مشروع اسمه وانت معدى بنمر زيارات على مرضى الاورام عندنا ف المستشفى
يااه كميه عذاب فظيعه ربنا يصبرهم
بس جميل البوست ده
احتمال كبير قوى بعد اذنك انقله عندى ونشارك بيه ف الحمله
وربنا يقوم والدتك بالسلامه ..واضح انها جميله فعلا ربنا يقويها ويبقيها لكى ويخليكوا لبعض
مش عارف اوصف باياه ولا بايه
بس ربنا معاكى
سلاموو ومنتظر جديدك وربنا يارب يوفقك فى امتحانات وحياتك ويهديك للرشد ويبصرك بالصح ويدخلك الجنه
بس همسه بجد عابره اقرى سيره وحبى النبى والصحابه وابعدى عن اى شبهه
اقرى سيره واتأكدى ان الكتب دى مش محرفه وناس كتير تعبت علشان توصلها
بس كده
ربنا معاكى
سلاموو
ااه نسيت اقول قد ايه الكلمه اللى ف الاول دى حلوه بتاعه قطره المحيط
وحلوه اكتر التقديمه بتاعتك ع البروفايل
تمتلكى بساطه الكلمات التى تخرتق ببساطه الطلقات قلوب صدئه ومدرعه
ربنا يزيدك
بجد مبهور
سلاموو
سيدى حازم سويلم
سعيدة بتعليقك ..انا لم انكر ان الاسلام قدم الكثير للمرأة خاصة فى المجتمع العربى القديم(الجاهلى)..وهذا ما ذكرته فى اول تساؤل، ولكن هل رفع مكانتها بالقدر المنصف ؟ هذا هو السؤال.. انا لم اقدم تفسيرات ولا قراءات لاحاديث وايات، بل انا من تحتاج إلى هذه التفسيرات والقراءات ..وكل ماكتبته ليس سوى مجرد تساؤلات.
رأيك عن الـ"مفعول به" مازال مثيرا للتساؤل ، لماذا "جعل الله" المرأة دايما ملزمة من الرجل ؟ ما الذى ينقصها لتكون ملزمة من نفسها مادامت غير قاصر ؟ ام ان الله خلقها قاصر بالفطرة؟
مثلما هى ابنة او زوجة فالرجل ايضا يكون ابن او زوج ما معيار التمايز هنا؟
انا ارى فقط مااستطيع رؤيته ، ولم اجد صورة حسنة واخرى سيئة فأخترت السيئة ..ولهذا طرحت هذه التساؤلات لربما ارانى احد هذه الصورة الحسنة التى اعجز عن رؤيتها
كل تحياتى لك :)
شباب روش طحن
مرحبا بعودتك ..وربنا معاك :)
ساجيتاروس
شكرا على رأيك ، ويشرفنى انى اشارك بطريقة غير مباشرة ف الحملة دى..
وشكرا بردو على نصحك وانا هحاول اقرا الكتب اللى قولت عليها وانا قريت سيرة محمد وسمعتها اكتر من مرة وانا فعلا بحبه كشخصية تاريخية وانسانية بس مش كنبى كامل معصوم مرسل..بمناسبة الكمال، لما حد بيقول ان الدين ده كامل مبيفكرش فى معنى الكمال،مجرد ان اى حاجة بتنتقد ده بينفى عنها صفة الكمال ،حتى لو الانتقاد ناشئ عن سوء فهم فمجرد ان الحاجة دى يساء فهمها فده ينفى عنها صفة الكمال ، مفيش حاجة فى الدنيا اسمها "كمال" دى قيمة اخترعنها .. و كنت اتمنى بردو انك تقولى "المنظور الاخر" اللى غير المنظور اللى بشوف بيه عشان نتبادل الافكار:)
تحياتى
اسمحيلي اقولك يا حبيبتي انك لو فعلا بتحبي النبي محمد صلى الله عليه وسلم .. ما تدخليش مدونة بن كريشان وتشكريه على بوستاته .. لأنه لا يتحلى باي أدب ويسب الله ورسوله !!!! ما علاء ومنال مثلا مش مؤمنين لكن ما بيغلطوش الغلط ده .. ده مجرد انسان عايز يعيش الفجور ومش طايق اي التزام بأي مبادئ ..heba
على فكرة انا طرحت نفس الافكار دى واكتر فى الموضوعات دى
http://demaghy.blogspot.com/2007/04/1_20.html
http://demaghy.blogspot.com/2007/04/2.html
اتمنى تشرفينى برايك
عزيزتى هبة
لو دورتى على تعليقاتى كلها فى بلوج بن كريشان هتلاقي معظمهاانتقاد لعدم حياديته ولـ"بجاحته" ونظرته المريضة للمرأة..
لكن اخر بوست عجبنى..لو اخدتى بالك انه مركزش فيه على انتقاد الاسلام كأنه مصدر الشر فى العالم ومنبع التخلف والارهاب على الكرة الارضية..لكنه فى اخر بوست اتكلم بموضوعية عجبتنى وكلام دخل دماغى
فيها مشكلة انه زى لما حاجة مش بتعجبنى بقول انها مش عجبانى ، لما حاجة تعجبنى اقول انها عاجبانى ؟؟؟
وده فعلا اول كومنت ليا على بلوج بن كريشان اعبر فيه عن اعجايى بحاجة كتبها فى كل البوستات القديمة كأننا "مولودين فوق راس بعض"، وممكن تتفضلى وتراجعى تعليقاتى على البوستات القديمة بتاعته
ده بالنسبة لموقفى من بلوج بن كريشان ،موقفى بالنسبة لسيدنا محمد، انا قولت انى بحبه كشخصية تاريخية وانسانية ، وبيكتسب قداسته بالنسبة لى فقط من قداسته بالنسبة للطرف الاخر فى الحوار بمبدأ احترام معتقد الاخر ومراعة الحساسية الدينية طالما ده ممكن ومش هيأثر عليا ،
مش معنى انى بدخل على بلوج بن كريشان انى مش بحترم الاسلام ونبيه ومعتقداته ولا معناه انى بتعجبنى الوقاحة والتجريح اللى عليه ..بالعكس وانا قولت كده كتير هناك
تحياتى:)
Drops from the Ocean
انت عبقرية
حقيقي اشكرك على شجاعتك الادبية
وعلى اسلوبك الراقي
وبغض النظر عن اتفاقي او اختلافي معك
احييك
جدا
جدا
جدا
ولك مني كل التقدير والاحترام
احييكي علر جرأتك فعلاً
ده مش عيب انك تسألي بكل صراحه و علو صوت عن امور حياتك ودينك
بس في نقطه صغيره نفسي اتكلم عنها شويه
من حقك تسألي زي ما انتي عايزه بس اهم حاجه يكون عندك يقين ان ربنا مخلقش حد علشان يهينه أو ينصف حد على حسابه
صدقيني ربنا اكبر منكده بكتير يمكن يكون الظاهر لك كده لعدم تعمقك في تفسير تلك الايات الكريمه
الاهم من ده اوعي يكون عندك شك ان ربنا خلق المرأه علشان يهينها...انا معاكي انها اتخلقت ضعيفه بس ربنا قواها بالرجل و الرجل كمان اتولد و عنده حاجه شديده للمرأه و نقص في حياته و لكنه كمله بوجود المرأه ف حياته
يا ريت تبصي للموضوع من كل ناحيه
هتلاقي في الاخر كل واحد واخد حقه
و اهم حاجه في ديننا...نسأل بكل حريه
و لكن لا نعترض
أنا آسف على التطويل
سعودي
واو بردو حمدى وفتحى ع البلوج ف نفس ذات المرة !!:)
محمد ،انا قريت البوستين والاتنين روعة بجد ، ياريت البنى ادمين فى مجتمعنا يبقى عندهم الوعى ده عشان هو ده الوسيلة الوحيدة عشان نطلع من "اشد العصور انحطاطا" على رأي حازم..
بس بجد مفيش مرة مادخلت على مدونتك وطلعت من غير مااستفيد حاجة على الاقل ... تسلملنا دماغك :)
بس انا قصدى على نظرة الدين (الصرفة) للمرأة، وحاولت اجرد النظرة دى من احكام وتابووز المجتمع ، قصدى على الاسلام والمرأة، مش المجتمع الاسلامى-الشرقى والمرأة.
مصطفى، بعض ماعندكم يادرش:)
سعودى،
اولا منور :)...ثانيا،فكرتنى بوالدى لما كلمته ف الموضوع وانهى نقاشنا الطويل بأنه قاللى "ربنا خلق الرجل، وخلق المرأة..وهو ادرى بخلقه..والقاعدة الاساسية ان احكام قران ربنا مش بيظلم بيها عبيده...مجرد مانقتنع بالقاعدة دى يبقى خلاص كل حاجة هتبان"
للاسف معرفتش اقول لبابا انى معنديش الايمان الكافى بالقرآن ولا بربنا اساسا،اللى يخلينى اقتنع بالقاعدة الجميلة دى :)
مبدأيا لما الواحد بيحب يحكم على حاجة حكم محايد بيطلع برا الموقف وبيبص عليه من فوق ،لما اجى احكم على وضع المرأة فى الاسلام مينفعش اعمل حكم مظبوط وانا ببص من منظور اسلامى وحاطة قواعد ومسلمات اسلامية بحته و ابنى عليها الحكم!! ..لازم اطلع بعقلى من (صندوق) الاسلام لمدة ثوانى ، وابص وانا بره على الاسلام ككل بكل المعطيات اللى مديهانى واحللها وانقدها منغير مسلمات مسبقة ،من منظور انسانى محايد ساعتها بس الحكم يبقى عادل..
ايوه للاسف انا عندى شك..بينى وبينك عندى شكوك كتييير..او بمعنى اصح معنديش اصلا حاجة اسمها يقين مطلق
وبردو..نفسى اى حد يحددلى بالظبط اروح ازاى للناحية التانية المنطقية بالنسبة للاحكام الشرعية والايات والاحاديث اللى بسأل عليها من وجهة نظره.... عشان انا بدور عليها مش لاقياها ...
تحياتى:)
عزيزتي القوانين الوضعية هي اللي ظلمت المرأة .. مش الدين..الدين ابسط كتير من التعقيدات اللي القانون عاملها.. والناس كمان بتعقد حياتها وما بتخافش من ربنا .. يعني عمري ما قريت مشكلة الطاعة والكلام ده على زمن النبي صلى الله عليه وسلم او الرؤيا .. المجتمع لم يكن يصم المطلقة .. الزوج كان يخاف الله ويعلم انه مطلع .. مش يعند ويسيبها معلقة .. الاسلام اعطى المرأة حق العصمة .. لكن مجتمعنا صورها على انه شئ لا يليق الا بالساقطات!!!! ولم يعد يقبل بهذا رجل!! علشان منظره وكرامته ..يعني العادات والتقاليد هي اللي بتتحول لشرع وبتطمس على الشرع!!ده اللي انا شايفاه.heba
نسيت اقولك ان رجال الدين والقانون ليسوا ملائكة .. فهم في النهاية رجال.. ومرت بهم حقبة كانوا ينحازون للرجل.heba
اتمنى ان ترجعي الى كتاب الدكتور مصطفى محمود ( حوار مع صديقي الملحد) بالفصل السادس
يا رب ينفعك
و هتلاقي الكتاب و مؤلفات كتير في الرابط ده
http://www.as7apcool.com/vb/showthread.php?t=182381
يا رب يعجبك
سعودي
هتفتكري اني من غير ما أستأذن منك
خطفت موضوعك ده وحطيته في مدونتي
لكن انا مليش دعوة هو اللي طار لوحده لحد مدونتي
بس اعمل ايه الافكار ليها اجنحة ومحدش يقدر يمنعها توصل للانسان
قال محمد(ص) في "خطبة الوداع": "أما بعد أيها الناس، فإن لكم على نسائكم حقاً ولهن عليكم حقاً، ولكم عليهن أن لا يوطئن فرشكم أحداً تكرهونه، وعليهن أن لا يأتين بفاحشة مبينة، فإن فعلن فإن الله قد أذن لكم أن تهجروهن في المضاجع وتضربوهن ضرباً غير مبرح، فإن انتهين فلهن رزقهن وكسوتهن بالمعروف، واستوصوا بالنساء خيراً فإنهن عندكم عوان لا يملكن لأنفسهن شيئاً، وإنكم إنما أخذتموهن بأمانة الله واستحللتم فروجهن بكلمات الله".
رُوي عن عبد الله بن عمرو بن العاص: قال لي رسول الله: يا عبد الله ألم أخبر أنك تصوم النهار وتقوم الليل؟ قلت: بلى يا رسول الله. قال: فلا تفعل، صم وافطر، وقم ونم، فإن لجسدك حقاً عليك، وإن لزوجك عليك حقاً، وعن حكيم بن معاوية القشيري عن أبيه قال: قلت: يا رسول الله ما حق زوجة أحدنا عليه؟ قال: أن تطعمها وتكسوها إذا طعمت أو اكتسيت، ولا تضرب الوجه، ولا تقبّح، ولا تهجر إلا في البيت".
ومن حقوق المرأة على زوجها أن يحميها. قال محمد: "إني أحرِّجُ عليكم حق الضعيفين: اليتيم والمرأة" ومن حقوقها عليه ممارسة الجماع إذ "الوطء واجب على الرجل إذا لم يكن له عذر، وبه قال مالك. وإن سافر عن امرأته لعذر وحاجة سقط حقها على القسم والوطء وإن طال سفره، ولكن إن يكن له عذر أو إن اعتذر عن إبائه الجماع غير مرة، فرق بينه وبينها. وإذا كانت له امرأة حرة لزمه المبيت عندها ليلة من كل أربع ليال، وإن كان له نساء فلكل واحدة منهن ليلة من كل أربع ليال. ومن حقوقها عليه أن يعامل أزواجه بعدل. وجاء في الحديث: "من كانت له امرأتان يميل مع إحداها على الأخرى، جاء يوم القيامة وأحد شقيه ساقط".
اختى الفاضله انتبهى لما انتى فيه الان فربما تستطيعين الرجوع الان وربما ان اطلت المسير ما استطعتى العوده
قال -صلى الله عليه وسلم- :" تُعرض الفتن على القلوب كالحصير عوداً عوداً، فأي قلب أشربها نُكتت فيه نكتة سوداء، وأي قلب أنكرها نُكتت فيه نكتة بيضاء، حتى يصير على قلبين: أبيض بمثل الصفا فلا تضره فتنةٌ ما دامت السماوات والأرض، والآخر أسودٌ مِرباداً ـ أي صار كلون الرماد من الربدة ـ كالكوز مجخياً ـ أي مائلاً منكوساً ـ لا يعرف معروفاً، ولا يُنكر منكراً إلا ما أُشرِب من هواه "مسلم
وان شاء الله سيكون لى ردود كامله على موضوعاتك فيما بعد لان عندى امتحانات
اسال الله لى ولك ولكل العصاه الهدايه
فاللهم اهدنا اجمعين
يقول أمير المؤمنين الإمام علي- رضي الله عنه - في إحدى خطبه المشهوره : ((
عجبت إلى الذي ينكر وجود الله وهو يرى خلقه , وعجبت إلى الذي ينكر النشأة
الأخرى وهو يرى النشأة الأولى,وعجبت إلى الذي ينكر عودة الخل وهو يرى ابتداْْءه
هبة
عزيزتى ، اتفق معك فى ان القوانين الوضعية قد تكون ظالمة بشكل عام ، أو ظالمة للمرأة بمناسبة الموضوع ، لكن القوانين الوضعية تأخذ لقب (وضعية) ، بمعنى وقتما يتبين ظلمها او عدم صلاحيتها يجوز جدا مناقشتها (او حتى الثورة ضدها) وتغيرها جزئيا او كليا ، لكن الدين لا يتمتع بهذه الخاصية ، فلو كان دين ما (وما اكثر الاديان) ظالما ، فعلى متبعيه تقبل هذا الظلم والتسليم به دون تفكير ، وان فكر احدهم فعليه تزييف/تزيين هذا الظلم ليبدو كعدالة الهية ، فيأتى الجيل تلو الجيل وقد تشوه مفهوم العدل فى عينيه ، ترسخ الظلم وصار هو الامر الطبيعى ،فمثلا.. إذا قلت لأحدهم "اليهود ، كسلالة او كدين ، مينفعش نعملهم اعداءنا لمجرد انهم يهود" فسيحدق فى وجهك "انتى عارفة اكتر من ربنا؟؟ ده ربنا قال عليهم اشد الناس عداوة للذين امنوا !!!!" ... وهكذا..وهنا تكمن مشكلة الاديان .
تحدثتى ايضا عن تعقيدات المجتمع اليوم وبساطة المجتمع فى زمن النبى ورغم الصورة التى تقترب للمثالية فى نظر الكثيرين ، و لا اراها انا كذلك ،فأنا اخشى ان مجتمعهم لم يكن يعانى من مشاكل فى الطلاق ليس بسبب تفتحهم وتحضرهم بل لأن المرأة للاسف كانت دمية تتناقلها الايدى ،(لو واحد عايز يجامل واحد صاحبه بيطلق مراته ويجوزهاله،والناس تفرح بيه بقى ويسموها "مؤاخاه" (بن عوف وبن الربيع) !!) ، اما عن العصمة ، او "تفويض الطلاق" كما يسميه العلماء ، فيبدو ان مجتمع النبى كان يعانى ايضا من نفس نظرة المجتمع اليوم ، فلم يثبت على حد علمى ان النبى او احد الصحابة اعطى زوجته العصمة ، بل هو اجتهاد من العلماء ومختلف عليه من الائمة الاربعة ، غير ان حق العصمة للزوجة-بعكس مايظن العامة- لا يلغى عصمة الزوج ويظل له الحق فى تطليقها اذا اراد (انا شخصيا اعتقد ان الزوجين زى مااتفقوا على الارتباط لازم يتفقوا على الانفصال ، مش حد يطلق التانى مع نفسه كده)
سعيدة كالعادة بكلامك ، و اسفة انى طولت وانى علقت متأخر :)
مصطفى باشا فتحى
بجد دى حاجة تسعدنى ان موضوع من عندى يعرف يطير لحد عندك :)
سعودى
لا حراااام (وش بيعيط) ، اموت واعرف ايه اللى بيقنعكم بالكتاب ده ، مع احترامى الشديد لمصطفى محمود بس كتابه ده ميقنعش غير واحد نفسه يلاقى اى حاجة تقنعه وخلاص عشان يسكت نفسه !!
بليز يامحمود اقراه تانى بس بنفسية واحد بيدور على الحق مش واحد بيدور على اى حاجة تقنعه ان معاه الحق .
انا قريت الكتاب ده وكتبت بوست عنه قبل كده عن نقطة فى نفس الفصل اللى انت بتقولى اقراه (http://drops-from-the-ocean.blogspot.com/2007/10/blog-post_24.html) .. وللأسف تبريرات وتفسيرات متقنعش اختى اللى عندها ست سنين :( بس شكرا جدا - انا بحب اوى ان حد يوصينى بكتاب اقراه - على طول من ده اوك؟ :) :)
غير معرف
اخى الفاضل ، تعليقك الغنى هو الذى حفزنى لبعض البحث و لتحديث الموضوع ،
لم اجد نص مطابق لاقتباسك من خطبة الوداع ، لكنى للاسف اراها منقوصة وتكاد تكون ظالمة .. العدل هو المساواة فى الحقوق والواجبات (بالتأكيد مع مراعاة الاختلاف الجسمانى بس منغير تلاكيك) ، النص الذى ذكرته يقول ان حق الزوج عند زوجته هو عدم خيانته (صيانة شرفه - بتعبير اهل القبيلة:)) ، مع انه حق متبادل (لا الراجل يخون مراته ولا الست تخون جوزها) ، وحق الزوجة عند الزوجها فهو انه يصرف عليها ماديا بالمعروف ، وهو ايضا مشروط بتأديتها حقه المذكور ، (فإن انتهين ...) !! بالاضافة لتعبير "عوان" الذى اراه تعبير بدوى مهين !! للأسف ياسيدى لا اجد رائحة العدل او الحكمة فى هذه الكلمات :(:(
حديث صيام الدهر بحبه اوى ،محتوى حديث القشيرى والحديثين اللى بعده كلها حقوق منقوصة (عفوا، لا تختلف كثيرا عن حقوق البهائم- اكلها و سكنها و متضربهاش بالجامد ...ياااااسلام ده اللى ناقص كمان:(:( ! ) ، العدل بين الازواج متطرقتش ليه ..
اقدر كثير نصحك وتنبيهك و اشكرك على دعاءك لى ، و ياريت تدعى لأختك دايما بالهداية ، محدش يعرف مين اللى فى النور ومين اللى فى الضلمة .. انا كمان بمتحن - بالتوفيق بقى :) ، ويسعدنى انى اسمع رأيك فى باقى المواضيع :)
عزيزتى
قبل ما اقرا تعليقك جيت اشوف البلوج بتاعك وللاسف لقيت الموضوع ده
اصلى فى صراح مع ناس كتير من اجل ارائهم ومختلف معاهم وانتى لو كنت قريتى البوست اللى قبل ده كنتى شوفتى الحضارات والاديان كانوا بيعملوا ايه فى المراه
ودايمن لما تحكمى على شئ قرنيه بالحاجات اللى حوليه وبشئ تانى علشان تعرفى قيمته لاكن هحاول ارد عليكى
بس حاسس كلامك مش مبنى عن فهم حقيقى وشكلك مش بتقرى الايات اللى بتساوى بين الذكر والانثى والاحاديت اللى بتوصى بالانثى موضوع
انا مش هنقشك فى الاحاديث دلوقتى لانى معرفش صحتها
بس هقولك ليه جبتى الحديث ده ومجبتيش حديسث الخلع اللى
دى المشكله حتى لما نهى الرسول عن الضرب خلتيه نهى علشان معاشرة المراه
على العموم هعلق تانى بس بصوره اكبر
ومنتظر مقارنتك بالاديان والحضارالت الاخرى علشان نعرف ايهما انصف المراه
بس هرد على اول سؤال مين قالك انه مرفعاش اكتر من الرجل فى حالات كتير زى لما تكون ام مثلا
وايه اللى مخليكى تحسى انه رفع الرجل عن المراه باى ميزه اداها للرجل احب اعرف
تحياتى
سلام
جيت اعرفك اني دخلت مدونتك بالرغم من انك ماحطتيش الرابط
وبصراحة تدويناتك كل واحدة واخرى عاوزة قاعدة ورد كتيييييييير
بس لي عودة مع كل واحدة على حدة
هنا بالذات في التدوينة دي اختلف معاكي جدا
الاسلام اعطى المراة كافة الحقوق ورفعها على الرجل واننا نتساوى بيهم دة قمة الظلم لينا لان هتبقي مطالبة بواجباتك الاصلية ويضيفوا عليها كمان واجبات بيقوم بيها الرجل لها المراة يعني
بس كمسلمة يا اختي المفروض لا تشككي في دينك
اسالي براحتك واتاكدي بدون زعزعة للايمان
الاسلام كامل لم يترك شيء
القوانين والبشر هم اللي اساءوا للدين وتاكدي لو كان الشرع طبق بما يرضي الله ماكانش هيبقى فيه ولا قضية واحدة معلقة في الاحوال الشخصية وماكانش هيبقى فيه ضغائن بين المطلقة وطليقها وماكانش وماكانش
العيب قي البشر والقوانين مش في الدين
اما تعليقاتك في موضوعي لي فيه عودة
أحب أولا أن أشكرك على شجاعتك في عرض ما لديك من شكوك ووسواسات
ثانيا : بالنسبة لتعليقي أسف لن أتكلم في موضوع التساؤلات فالموضوع أكبر من ذلك .. ثم إننا لو تناقشنا في أي موضوع مختلفين فيه يجب أن يكون هناك قاسم مشترك بيننا .. وقاعدة ننطلق منها
ولذلك وجب علي أن أطلع برة وابص على الموقف من الخارج كما قلتي
فنظرت من الخارج فوجدتني إنسان عجيب في بنيتي ... أجهزة تعمل بداخلي وفق نظام دقيق عجيب أرى أنه من المستحيل أن تكون قد وجدت هكذا دون أحد صنعها وخلقها ... وهذا الإنسان العجيب يعيش وسط عالم أيضا بالتبع عجيب ليل ونهار في وقت محدد لم يختلف طوال حياتي وأعتقد أنه بالتأكيد لم يختلف أبدا .. أرض وبحار لهم حدود هذا لا يجير على وهذا وهذا لا يتعدى على ذاك .. نظام كوني في منتهى الدقة .. أرى أنه من المستحيل أن يوجد مثل هذا النظام بدون خالق ولا واجد ولا أنه صنع من العدم
هذه هي نظرتي لنفسي وللعالم حولي من برة وبكل حياد
هل توافقيني على هذا الكلام ؟؟؟؟
انتظر ردك
وكنت اتمنى أن يكون الكلام مباشرة
احساس بردو حى
نورت المدونة ،وسورى عشان اتأخرت ف الرد
اقتباس "وانتى لو كنت قريتى البوست اللى قبل ده كنتى شوفتى الحضارات والاديان كانوا بيعملوا ايه فى المراه ، ودايمن لما تحكمى على شئ قرنيه بالحاجات اللى حوليه وبشئ تانى علشان تعرفى قيمته لاكن هحاول ارد عليكى"
انا قريت البوست ده قبل ما اعلق على البوست التانى ،وانا عارفة ان وضع المرأة فى الحضارات القديمة كان اصعب من وضعها فى الاسلام ، لكن ياعزيزى انا مش هقارن بين نظرة الاديان والحضارات التانية للمرأة ونظرة الاسلام ليها لأنها مقارنة ملهاش اى لازمة ، انا بقارن بين النظرة المنطقية الانسانية الطبيعية للمرأة اللى بيشوفها العقل السليم وبين النظرة الاسلامية ليها
انا بكره مبدأ "كلما زاد قبح الاخرين ظهر جمالنا" ، لكن لو عايزنى اقارن هقولك :
الحضارات القديمة اللى انت قولتها والاديان دى ظلمت المرأة اكتر من ظلم الاسلام ليه
مش هقول :
يااااه ، دول كانوا ظالمين المرأة اوى ، يبقى الاسلام عادل مع المرأة بقى
!!!!!
يعنى المقارنة مين بيظلم اكتر ، مش مين ظالم ومين عادل.
اقتباس : "حاسس كلامك مش مبنى عن فهم حقيقى وشكلك مش بتقرى الايات اللى بتساوى بين الذكر والانثى والاحاديت اللى بتوصى بالانثى"
ده فهمى اللى ربنا قدرنى عليه ، وانا فهمى محدود بحدود عقلى- فهمى على قدى يعنى-، بس ايه فهمك انت بقى لنفس الايات والاحاديث دى؟
اما الايات اللى ساوت بين الذكر والانثى فاللى اعرفه انها مساواة اخروية فى الثواب والعقاب ادام ربنا، لكن مش مساواة ف الدنيا فى الكرامة والحقوق والواجبات .. ولو كانت كده فوجود الايات دى بردو ماينفيش نقط الظلم الموجودة...نفس مبدأ "ركلتنى !!! - لكننى عانقتك "
اقتباس :"انا مش هنقشك فى الاحاديث دلوقتى لانى معرفش صحتها بس هقولك ليه جبتى الحديث ده ومجبتيش حديسث الخلع اللى دى المشكله حتى لما نهى الرسول عن الضرب خلتيه نهى علشان معاشرة المراه"
نفس الكلام اللى فات ، حديث الخلع وغيره نقطة من نقط الانصاف بس مينفيش نقط الظلم . وانا مخلتش حاجة ، الحديث هو اللى بيقول كده !!! "الام يجلد احدكم امراته جلد الامه ولعله ان يضاجعها من اخر يومه == ازاى (استنكار) تجلد مراتك زى العبدة وانت يمكن تعاشرها بالليل " ، ده اللى فاهماه من الحديث
!!
اقتباس "بس هرد على اول سؤال مين قالك انه مرفعاش اكتر من الرجل فى حالات كتير زى لما تكون ام مثلا وايه اللى مخليكى تحسى انه رفع الرجل عن المراه باى ميزه اداها للرجل"
المرأة حتى لو ام بتفضل محتاجة ولى راجل يجوزها ويسافر معاها ويصرف عليها ، حتى لو كان الولى ده اخوها الصغير اللى عنده عشرين سنة وهى ست محترمة عندها 40 سنة ، تكريم الام فى الاسلام محدش ينكره ، لكنه منفاش بردو انها قاصرة واعتمادية و غير مسئولة .
الاسلام مرفعش الرجل ، لكن نزل المرأة ، فالولد بمجرد مايبلغ فمن حقه ياخد قرارته لنفسه بدون اذن حد ، ويبقى مستقل و مسئول.
الطبيعى ان كل انسان مهما كان جنسه مسئول عن قرارته وبيقدر يعتمد على نفسه
انا بكتب وانا نايمة ، يارب ماكونش عكيت فى حاجة ويكون كلامى راكب على بعضه
تحياتى :)
عزيزتى nonoymm
نورتى المدونة ، وتعليقاتك على مواضيعى اكيد تهمنى
اقتباس :"الاسلام اعطى المراة كافة الحقوق ورفعها على الرجل واننا نتساوى بيهم دة قمة الظلم لينا لان هتبقي مطالبة بواجباتك الاصلية ويضيفوا عليها كمان واجبات بيقوم بيها الرجل لها المراة يعني "
الاسلام ادى للمرأة حقوق صح ،لكن مش كل حقوقها ، ومش فاهمة ازاى رفعها على الرجل !! ، والمساواة حاجة مش شارب كده ، يعنى محدش بيقول الرجالة يخلفوا ويرضعوا بالاضافة للى بيعملوه والستات تروح الجيش وتصرف على اخواتها الولاد وابوها بالاضافة للى بتعمله
!!!!
المساواة فى الانسانية والكرامة والحقوق والواجبات المتناسبة مع طبيعتهم بدون تعسف ، يعنى مثلا محدش يقول الست ماتخدش قرارتها عشان هى عاطفية بطبعها !!! ياااسلااااام ، كده المرأة مش معناه انها عاطفية بطبعها معناه انها عبيطة بطبعها وقاصرة بطبعها ، ولو ياسيدى ، عاطفية ، طيب هى دى قرارتها ولا قرارات الجيران ، ماهى اللى هتتجوز وهى اللى هتسافر وهى اللى هتمشى حياتها هى ، يعنى محدش هيتضر غير نفسها
اقتباس : " بس كمسلمة يا اختي المفروض لا تشككي في دينك ، اسالي براحتك واتاكدي بدون زعزعة للايمان ،الاسلام كامل لم يترك شيء
القوانين والبشر هم اللي اساءوا للدين وتاكدي لو كان الشرع طبق بما يرضي الله ماكانش هيبقى فيه ولا قضية واحدة معلقة في الاحوال الشخصية وماكانش هيبقى فيه ضغائن بين المطلقة وطليقها وماكانش وماكانش "
انا لادينية والله :) ،انا مقتنعة جدا ان المسلمين اساءوا للاسلام اوى ، بس مقتنعة بردو انه مش كامل وانه كمنهج غفل عن حاجات وغلط فى حاجات ، والدليل على كده اننا بنتكلم عليه دلوقتى ، الكمال لما بيتنسب لشى بينفى عنه اى نقطة نقد من اى حد ، لما اقولك ان اللوحة دى مثلا كاملة ومفهاش اى نقص ولا عيب هبقى يبقى لازم محدش غيرى يقدر يطلع فيها اى عيب من وجهة نظره ، لو كان الاسلام كامل يبقى مفيش حاجة اسمها انتقادات ضد الاسلام حتى لو انتى شايفاها انتقادات باطلة ، الكمال بينفى نسبية الواقع وده اللى بيخلى مفيش حاجة كاملة ولا فى حاجة اسمها كمال ، لأن كل حاجة ف الدنيا نسبية انتى شايفاها حلوة وغيرك ممكن يشوفها وحشة ، الاسلام مش كامل و انا اسفة عشان بقول كده .
انا بردو بكتب وانا نعسانة ، يعنى شغالة بعقلى الباطن فأسفة لو كان كلامى مهيس شوية :):):)
تحياتى
عزيزى محب الدين
سعيدة بردك :)
اتفق معاك تماما فى الاعجاز الواضح فى تكوين الوجود من اول الاميبا لحد المجرات مرورا بالانسان ومليارات الموجودات ، الاعجاز ده ناتج عن قصور ومحدودية عقلنا احنا البشر فى فهم الوجود بصورة واضحه ، يعنى لو انا طول حياتى فى الصحرا ووقفت ادام ناطحة سحاب فى دبى هتبقى بالنسبة لى اعجاز ، لو انا عايشة فى كهف و واحد جاب لى لابتوب هيبقى بالنسبة لى اعجاز ، فعجزى وحبى للتفسيرات -زى كل انسان -ممكن يخلينى اعمل تفسيرات مش منطقية ، اقول مثلا الصندوق ده فيه جن ، او انه من مخلوقات ربنا .. و المبنى ده الشايطين هى اللى عملته ، او انه نزل م السما الخ ، بس فى طريق تانى ادامى انى اقول "مش عارفة افسر البتاع ده" وارضى بعجزى ده واحاول ادرسه ...
وده اللى حصل معانا
:
-الكون ده كله المعقد ده جاى منين يا محب ؟؟
-والله مااعرف يادروب
-مممممممم ، ماهو اكيد جه من حاجة يعنى
-اه واكيد الحاجة دى كبييييييرة اوى وذكية اوى وكانت موجودة قبل الكون
-وااااو ، هى اللى بتخلى الشمس تطلع ، والارض تلف ، والليل يجى !!!
-اه ، هى اللى لما بتغضب البرق والرعد بيملو السما ، ولما بتفرح المطر والخير بينزلوا علينا ، هى المتحكمة فى كل حاجة
- يالهوى يامحب !! لازم نعبدها ، دى هى اللى خلقتنا ،وهى المتحكمة فينا وبتحدد مصيرنا ، وهى قوية اوى اوى وممكن تعمل فينا حاجة
الخ .... يعنى ببساطة مفهوم "الله" قديييم اوى اجدادنا اللى عملوه وطورناه عشان نرضى عجزنا ونلاقى تفسيرات للحاجات اللى مش عارفين نفسرها ، لكن دلوقتى عرفنا ان البرق سحابتين خبطوا ف بعض بالصدفة مش كائن عملاق غاضبان ، وان الارض بتدور حوالين الشمس بالطرد المركزى عشان كده النهار والليل بيجوا ، مش فى ملائكة بتشيل الارض وتلف بيها ، وان مفيش حاجة مادية اسمها سما متعلق فيها النجوم ولازم حد يسندها عشان متقعش علينا ...الخ الخ الخ
انا مسحت تلت تربع الرد عشان لقيته طويييل اوى ولسه مخلصتش والكلام مش هيخلص ، لكن ممكن تقرا الفصل التانى من كتاب "الكون" ، ممكن يقدملك شوية تفسيرات علمية لتساؤلاتك .
وكمان ممكن تقرا التعليقات على موضوع "عندما تهاوت اصنامى"
كل الكلام ده مينفيش احتمال صحة وجود خالق ، لكنه بيقدم مفاهيم تانية عقلانية بديلة ، حاجة من الاحتمالين ممكن تبقى صح عشان مفيش حاجة اسمها حقيقة مطلقة عند البشر حتى لو كانت نازلة من السما.
افتكرت موقف فى كتاب الكون ، صحفى طلب من عالم كبير تقرير من 500 كلمة عن وجود حياة فى عوالم بره الارض ، فكتب جملة
"No Body Knows "
250 مرة وقدمهاله :):)
علمنا عمره ماهيقدم حقيقة ويقول ان دى حقيقة مطلقة ، دايما احتمال الجهل والصواب والخطأ موجود ، وهنفضل كده تايهين ورا الحقيقة لحد نهاية وجودنا
تحياتى وشكرا لأهتمامك :)
إقتباس من كلامك :
انا لادينية والله :) ،انا مقتنعة جدا ان المسلمين اساءوا للاسلام اوى ، بس مقتنعة بردو انه مش كامل وانه كمنهج غفل عن حاجات وغلط فى حاجات ، والدليل على كده اننا بنتكلم عليه دلوقتى
وأقول لك
ليس معنى أنك بتتكلمي على النقص الذي تدعي وجوده في الإسلام الكامل والخاتم والذي لا يأتيه الباطل من بين يديه ولا من خلفه أنه حاشا لله كمنهج غفل عن حاجات لا سمح الله ، بل اتهمي نفسك أولا
استاذ خالد..
يمكن حضرتك مكملتش قراءة الفقرة كويس...
انا وضحت بعد كده يعنى ايه كمال اصلا، وكون ان فى حاجة من صفاتها انها "يساء فهمها" ، او "تعرضت للإنتقاد" فده بينفى عنها صفة الكمال ككل..وعشان كده مفيش حاجة اسمها كمال مطلق ..
بالظبط زى المثال اللى قولته...تمسك لوحة فنية جميلة اوى ودقولى اللوحة دى كاملة يادروب ومفهاش اى عيب فنى .. ابصلها واقولك بس كذا فيها مش كويس ... تقولى لأأأأأ دى كاملة...ياخالد النقطة دى مش مظبوطة فيها....لأأأأأأ انتى مش بتشوفى كويس...العيب فيكى...بس اللوحة دى كااااااااملة.
كون ان النقاش ده حصل عليها ف ده نفى عنها صفة الكمال المطلق
تحياتى
عاوزة أقول حاجة
أنا بحب ربنا قوي
وحبي لربنا كان بيخلليني ابكي وأتأزم نفسيا لأيام وأسابيع وربما شهور ، كلما سمعت أو قرأت رأيا لحد بيحط من قدر المرأة سواء كان شيخ أو حد عادي، ويرجع كلامه لمرجعية دينية
وأفضل أسأل:ياتري ربنا قاصد بالآية دي، أو الرسول (ص) بوحي من ربنا قاصد بالحديث دة، ما أراده المتحدث فعلا؟..والا المتحدث دة تحدث من منطلق بداوته وبقايا جاهليته، وسلطته كرجل-وكل المفسرين والمحدثين رجال-
لحد ما وصلت لقناعة مهمة..ان ربنا عندما أنزل تشريعه خاطب عقلي واحساسي دون وسيط، واذا كنت قد قبلت التفسير والفتوي من أهل العلم؛فذلك لا يعني أن أترك لهم عقلي والأهم احساسي..لذلك قررت أنني سأتلقي من ربي ورسولي مباشرة، واذا كان التفسيرات متعددة، والأحاديث قد يتداول منها الضعيف والموضوع والمرسل، فكلام الله موجود ولأجرب تفسيره بقلبي..وسيرة النبي واضحة ومواقفه الصريحة موجودة..فالي قلبي كل ما أحتار فيه..آملة أن أصل
drops from thee ocean
أشكرك بشدة على متابعة التعليقات والإهتمام بالرد عليها ودي حاجة إيجابية جدا الواحد يحترمها في المدون وبداية للوصول الى حوار راقي المستوى إن لم يحقق فائدة ما فلن يسبب أي ضرر أي لا ضرر ولا ضرار
أما بخصوص النقص والعيب الذي تدعين وجوده في المنهج الإسلامي
وضربك مثال على هذا بلوحة نموذجية ورسام عبقري إنما هذا ينطبق على صنع البشر أما صنع الله من المسلمات الإيمانية طلاقة القدرة والكمال الذي لا يشوبه شائبة في عظمة أعمال الخالق والتي لا تخضع لأي مقارنة بشرية فلندع الخالق يتكلم عن منهجه
بسم الله الرحمن الرحيم
الذين يؤمنون بالغيب ويقيمون الصلاة ومما رزقناهم ينفقون
أنا أؤمن بالغيب
وسبحان الله هي أول صفه ذكرها الله سبحانه وتعالى في أول المصحف الطاهر
شكرا
ولك تحياتي
يضايقني بشدة عندما اقرأ ردودًا تتحدث عن الحقوق التي أعطاها الإسلام للمرأة وعن كثرتها وعظمتها ...
وكيف أن هناك بعض السيدات اللواتي يقلن هذا الكلام ببساطة وكأنهن يقلن أنهن قد حصلن على كل ما يرغبن به ..
الحقوق التي أعطاها الإسلام للمرأة هي أسس حياة وليست حقوق أو رفاهيات، لو أن الإسلام لم يعطي المرأة الحقوق التي تمتلكها حاليًا في الإسلام لكان من الأفضل أن يطالب بإبقاء عملية الؤاد الجاهلية .. فكما قلت قبل سطرين : هذه ليست حقوق قدر ما هي أساسيات حياة.
ما تتكلمين عنه هو أن تحصل السيدة على حقوقها الزوجية بأن يكون لها حق المعاشرة كما ترغب مع زوجها وحلالها، وحق الحصول على قراراتها بنفسها وحقوق أخرى كثيرة أخذها الإسلام وأعطاها للرجل كي ينوب عن المرأة في إتخاذ مثل هذه القرارات الجوهرية.
يلفت نظري دائمًا أنه في وعود الإسلام للمؤمنين به يتحدث دائمًا عن الجنة ذات الآنهار والحور العين والعذارى والجميلات ..
وكل هذه الأمور هي جنة للرجال .. لم اسمع قبل هذا عن ما ستحصل عليه المرأة في الجنة ؟!! حور عين رجالي مثلاً ؟!! مش عارف بصراحة :)
باختصار يا احمد وبدون الدخول في التفاصيل
مش عارف بصراحة اللي انت قلتها مش علشان مفيش اجابة لسؤالك وانما علشان انت جاهل بالامر دة وجاهل دي مش شتيمة دي قلة معرفة
اعمل بحث كدة في جوجل وانت تعرف زي البحث اللي عملته زمان كدة وعلى فكرة يا دروب قريب اوي هيبقى فيه صفحة تتناقشي فيها ويا ريت نتحاور اكتر ونشوف الاسلام ليه خلى المرأة مفعول بيها على طول كدة!!1!!
تحياتي
سيدتى السلام عليكم ورحمه الله وبركاته بدايه هل انتى مقتنعه بالاسلام كدين سماوى وتشريع سامى وكل ما طرحتيه هو مجرد تساؤلات تحتاجين إلى تفسير صحيح لهااذا كانت هى رغبتك فلنحتكم إلى العقل فى فهم نصوص الاسلام
اولا :تقولين ان المرأة فى الاسلام مفعول به دائما وانها لمجرد اللذة وهذا ينقص من قدرها هذا الفهم ليس على المستوى السليم فالمرأة فى الاسلام متساويه مع الرجل فى كل الحقوق والواجبات لا رفعه للرجل على المرأة
قال تعالى: ( ان اكرمكم عند الله اتقاكم
هذا خطاب للناس جميعا يبين انهم جميعا من اصل واحد وقاعدة التفضيل بين هذا الخلق جميعا لا علاقه لها بالذكورة او الانوثه بل مرجعها الى اقربهم إلى الله تعالى خشيه
ومن نصوص السنه :قوله صلى الله عليه وسلم (النساء شقائق الرجال )اى امثالهم دون انتقاص فى الاحكام والتكاليف وبنظرة خارج الاسلام ليكن الحكم مستندا ايضا إلى واقع فإنظرى إلى واقع المرأة فى العالم المعاصر ففى الهند مثلا لا يجوز نهائيا ان تعيش المرأة لحظه واحدة بعد زوجها بل يجب ان تحرق هى الاخرى وتلحق به وايضا لدى بعض القبائل الكبرى فى افريقيا حين تتزوج المرأة فلا بد وان تجر على وجهها حتى تصل إلى بيت زوجها ليله الزفاف كطقوس لا يستطيع احد ان يخرج عن إطارها و عند اليهود المرأة فى اثناء عادتها الشهريه تعتبر كائن نجس يجب عمل حجر صحى بالابتعاد عنه ولدى امم الرومان القديمه المرأة شيطان يجب احراقه دوما واخذ الحذر منه والماديه الحديثه فى العالم كله الان تنظر إلى المرأة على انها كائن للمتعه ووسيله للإغراء والوصول إلى الغايات الدنيئه وبقدرتك ان تتعرفى على مكانه المرأة لدى هذة الثقافات بالبحث فى المواقع او الدخول على هذا الموقع لتريين قيمه المرأة عند الاخر
http://nadine-5.maktoobblog.com/630176/%D8%B9%D8%AC%D8%A7%D8%A6%D8%A8_%D8%A7%D9%84%D8%B2%D9%88%D8%A7%D8%AC_%D9%81%D9%8A_%D8%A7%D9%84%D8%B9%D8%A7%D9%84%D9%85
وللحديث بقيه ارد بأذن الله عن كل استفسارتك والادله البراهين التى اتمنى ان تكون مشكاة نور لكى على طريق الحق والانصاف والسلام عليكم ورحمه الله وبركاته
على فكرة
انتى موهوبة
وربنا يباركلك
بس مش هانافقك واقولك خليكى فى اللى انتى فيه
ماقصدش الموهبة
لا قصدى اللى كتبتيه
ده
انا مش هاكلمك باسم الدين واقولك قال الله وقال الرسول صلى الله عليه وسلم
مع ان سبحان الله من تمسك بهما لم يهلك
اسف برضو بانسى وارجع اتكلم بالدين
انا مش عارف انتى زعلانة من ربنا " استغفر الله العظيم "
انتى بتقولى لازم تطلع بره الصندوق عشان تحكم
على فكرة انتى فعلا طلعتى بره الصندوق
بس للاسف دخلتى صندوق تانى
عامل ذى الطبل
شكلو من برة كبيييييييييييييير
ومن جوه فاضىىىىىىىىىىى
ومليان هوى
او ممكن يكون فيه شوية تراب
مع الزمن هاتلاقى الطبل ده اتقطع عشان ماستحملش
لانه اساسه فاضى
ممكن يا فندم تطلعى برة الصندوق ده وتبصى عليه كويس
وبعدين تحكمى
عشان حكمك ساعتها يكون بحياديه
ربنا يوفقك
اسف لعدم الاطالة
وما أدخل الفجرة النار إلا كبرهم وتمنعهم عن تقبل التشريعات الإلهية والتوجيهات النبوية صلى الله وسلم وبارك على نبينا أفضل الصلاة وأتم التسليم
hello, are you still there?
You write good content
Post a Comment